Uttanlands

Eldurin sløktur og framleiðslan støðgað

Tað hava fyrr verið trupulleikar við trygdini á gassvirkinum hjá Equinor á Melkøya

Melkøya (Savnsmynd: EPA)

Melkøya (Savnsmynd: EPA)

2020-09-29 07:41 Author image
Ingi Samuelsen

Ongin fekk skaða, men løgreglan hevur stongt tunnilin út til oynna Melkøya uttan fyri Hammerfest eftir at eldur kom í gassvirkið hjá Equinor í gjár. Eisini er bann sett fyri at flúgva í luftrúminum í einum radius á fimm kilometrar frá oynni, skrivar thebarentsobserver.com.

Eldur kom í eina turbinu á virkinum klokkan 15.30 lokala tíð í gjár, og um 18-tíðina høvdu tey fingið tamarhald á eldinum og roykinum.

Fyribils er framleiðslan av flótandi LNG jarðgassi støðgað sambært trygdarreglunum á virkinum.

Vatn er sprænt yvir so at siga alt virkið fyri at køla skipanina. Í fyrstuni ávaraði løgreglan um, at eldurin kundi breiða seg til størri partar av økinum, men um kvøldið varð ávaringin tikin aftur.

Framleiðslan av flótandi jarðgassi í Hammerfest byrjaði í 2007. Virkið tekur ímóti gassi frá Snøhvit-boriøkinum í Barentshavinum. Gassið verður flutt á marknaðin í Evropa og Asia.

Framleiðslan á virkinum varð støðgað 11. september. Eldsbrunin kyknaði bert fáar tímar eftir, at gongd varð sett á framleiðsluna aftur, skrivar thebarentsobserver.com.

Fleiri gasslekar hava verið hesi 13 árini, sum gass hevur verið virkað á Melkøya. Norsku myndugleikarnir fyri trygd í oljuídnaðinum hava fleiri ferðir funnist at trygdini á virkinum hjá Eqinor. Eqinor æt fyrr Statoil.