Innanlands

Olju- og frálandavinnan er framvegis áhugaverd

Olju­virk­semið nærhendis føroyska markinum framvegis áhugavert fyri føroyska vinnu heldur formaðurin í Oljuvinnufelagnum

Leif Hovgaard, formaður í Oljuvinnufelagnum

Leif Hovgaard, formaður í Oljuvinnufelagnum

2020-07-13 12:45 Author image
Jan Müller
Hóast eingi útlit eru fyri oljuvirksemi á føroyska landgrunninum í nærmastu framtíð, so er olju­virk­semið nærhendis føroyska markinum framvegis áhugavert fyri føroyska vinnu, m.a. tí føroyskar havnir eru longu kappingarførar við einari viftu av maritimun tænastum frá føroyskum veitarum, sí www.maritime-services.com, segði formaðurin Leif Hovgaard í síni frágreiðing til aðalfundin.
 
Í ársfrásøgnini fyri 2019 hjá Oljuvinnufelagnum, vísir  formaðurin, Leif Hovgaard á, at lítið og einki oljuvirksemi hevur verið á føroyska landgrunninum seinastu árini.

Í november 2019 fór freistin í 5. útbjóðingarumfari at søkja um loyvi at bora eftir olju á føroyska landgrunni­num, men einki felag søkti um loyvi.

Tað ber tó framvegis til at søkja landsstýrið um loyvi at bora eftir olju á føroyska landgrunni­num umvegis “Open Door” skipanina, men í løtuni eru smá útlit fyri, at tað verður nakað olju­virksemi á føroyska landgrunninum í nærmastu framtíð.

Hóast einki oljuvirksemi hevur verið á føroyska landgrunninum hesi seinastu árini, so hevur alla tíðina verið áhugi og nakað av virksemi við royndarboringum og tí, ið hartil hoyrir, nærhendis føroyska markið.

Virksemið nærhendis føroyska markinum er áhugavert fyri føroyska vinnu, tí føroyskar havnir eru longu kappingarførar við einari viftu av maritimun tænastum frá føroyskum veitarum, sí www.maritime-services.com

Harumframt er ferða- og flutnings­sam­bandið millum Føroyar og meginlandið í Evropa væl betri enn sambandið, sum Norður Skotland og Hetland kunnu bjóða fyritøkunum í olju- og frálanda­vinnuni.

Stóra menningin hjá føroysku hotell- og matstovu­veitaru­num seinastu árini, eigur somuleiðis at vekja áhugan hjá olju- og frálandavinnuni at venda eyguni henda vegin. 

Tí eigur størri orka at verða brúkt til at bjóða Føroyar fram sum ein maritiman tænastu­depil við einari breiðari viftu av tænastum á øllum økjum.

Annars hevur árið í ár hevur verið eitt serstakliga vánaligt ár fyri altjóða oljuvinnu. Stórt fall var í altjóða oljuprísunum í byrjanini av árinum. Síðan kom koronakreppan og tók botnin undan øllum oljumarknaðinum.

Altjóða olju­prísurin var søguliga lágur, tá ið koronakreppan var í hæddini. Prísurin er hækkaður nakað aftur í seinastuni, og tað er neyvan nakar ivi um, at oljuprísurin fer at fara upp aftur, tá ið virk­semið í altjóða búskapinum spakuliga fer at koma fyri seg aftur.

Hóast eingi útlit eru fyri oljuvirksemi á føroyska landgrunninum í nærmastu framtíð, so er olju­virk­semið nærhendis føroyska markinum framvegis áhugavert fyri føroyska vinnu sigur Leif Hovgaard í ársfrágreiðing síni.

Ársaðalfundurin valdi Anju Jacobsen, Leif Hovgaard, Eli Lassen, Christian Danielsen og Jannis Moraitis í nevndina. Frimodt Rasmussen varð valdur til tiltakslim.

Nevndin skipaði seg við Leif Hovgaard sum formanni og Eli Lassen sum næst­for­manni.